Var þetta markaðsátak fyrir sölu og dreifingarstarfsemi?

Margir hafa velt því fyrir sér hvað tvítugir strákar hafi verið að gera þarna inni á skólalóð á miðjum skóladegi.

 Núna þegar upplýst hefur verið að ökumaðurinn sé grunaður um vörslu fíkniefna og verið undir áhrifum þeirra að þá er ljóst að enn meiri hætta stafaði af akstrinum.

En einnig er líklegt að þarna hafi þeir verið að nota fyrsta skóladaginn til markaðsátaks með því að reyna að ganga í augum á nemendunum og vekja umtal innan skólans, og vekja þannig athygli á vöru sinni.

 

Ef tilgangurinn hefði hins vegar bara verið að þenja bílinn að þá eru fjölmörg svæði mun betur til þess fallin en skólaleikvöllur.

Hald lagt á sportbílinn

Takk fyrir mig!

Hér í Álaborg söfnuðust nokkrir tugir íslendinga saman til þess að horfa á úrslitaleikinn við frakkana og þrátt fyrir úrslitin að þá var hverju marki fagnað og klappað vel fyrir liðinu í lokin.

 

Það er búið að vera frábært að vera Íslendingur síðustu 2 vikurnar og geta eignað sér þetta frábæra lið sem hefur sannað að þeir geta unnið hvaða lið sem er.

 

Í úrslitaleiknum fannst mér að það vantaði aðallega bara einbeitingu, og þegar maður er að spila við Frakkana sem gera fá mistök, að þá má ekki klúðra neinum tækifærum.

Það skiptir hins vegar ekki máli, "strákarnir okkar" voru í mínum huga búnir að "vinna" í fyrradag og liturinn á medalíunni skiptir litlu máli.

Takk fyrir mig.

Ísland í 2. sæti á ÓL

SKÍTT MEÐ LANDIÐ! SKÍTT MEÐ REI

Eitt fyrsta verk nýs meirihluta er að ráðast í Bitruvirkjun.

Þetta gerir stóriðjumeirihlutinn þrátt fyrir að Skipulagsstofnun hafi gefið virkjuninni falleinkunn vegna umhverfisáhrifa. Skipulagsstofnun segir framkvæmdina óviðunandi vegna "verulegra neikvæðra og óafturkræfra áhrifa á landslag, útivist og ferðaþjónustu".

En það er ekki nóg með það nýr meirihluti skíti á landið og spúi brennisteini yfir Hvergerðinga, hann ætlar að bæta þessum framkvæmdum við þær framkvæmdir sem Orkuveitan hefur þegar ákveðið að ráðast í, þó eiginfjárstaða hennar sé hættulega lág fyrir.

 

En það er allt í lagi að skuldsetja Orkuveituna vegna þess að jarðhitavirkjanir séu svo arðbærar að þetta sé nánast hættulaus fjárfesting. Eða það gat maður lesið í Fréttablaðinu á dögunum.

 

En þegar kemur að því að nota þekkinguna úr Orkuveitunni til arðbærra verkefna erlendis að þá eru jarðhitavirkjanir ennþá áhættusaman og óásættanlegt að borgin taki þátt í þannig áhættufjárfestingum.

Þess vegna á að gera REI að fjárfestingasjóði þar sem þekkingin verður verðmetin og aðrir látnir fjármagna verkefnin.

Það hljómar kannski ágætlega, svona þar til maður áttar sig á því að í núverandi ástandi er allt verðmat í algjöru lágmarki og ágóðinn mun aðallega fara til þeirra sem koma nýir inn.

Það er nefnilega algjört brot gegn sannfæringu Sjálfstæðismanna að opinbert fyrirtæki geti grætt á einhverjum verkefnum. Slíkt er aðeins fyrir einkaaðila.

 

Annars er það markvert í nýja málefnasamningnum að Sjálfstæðisflokkurinn hefur snarsnúist í flestum málefnunum.

Rannsóknir vegna Bitruvirkjunar hefjast á ný

Borgarstjóri í einn dag

Stundum er spurt Hvað mundir þú gera ef þú værir borgarstjóri í einn dag? Líklega heyrast svona spurningum oftast beint til barna, en í dag virðist þetta vera einkennisorð borgarstjórnar.

Nú er komið að Hönnu Birnu að prófa stólinn og og hvað biður hún borgarbúa um? Jú hún biður um tíma til að láta verkin tala. Nákvæmlega það sama og fráfarandi borgarstjóri bað um, en við vitum jú öll hvernig það fór.

 

Ég er ekki frá því að skárra væri bara að láta krakka um þetta. Það væri meira að segja hægt að slá tvær flugur í einu höggi, fjölga leikskólaplássum og bæta borgarstjórnina með því að skipta borgarfulltrúum út fyrir leikskólakrakka í ráðhúsinu.

Hanna Birna kjörin borgarstjóri

Nauðsynlegt til að koma á samkeppni

Nauðsynlegt til að koma á samkeppni

Nýi diskurinn með íslensku hljómsveitinni Sigurrós kostar 2500 kall í Skífunni. En ef maður kaupir hann frá útlöndum, t.d. amazon.co.uk, að þá kostar hann þúsundkalli minna, þar með talinn 100 í vask.
Flutningsfyrirtækin hirða hins vegar tæpan 500 kall í gjald fyrir þjónustuna að rukka mann um 100 kallinn í virðisaukaskatt.

Þannig er mismunurinn milli Skífunnar og Amazon helmingaður í þessu tilfelli og hagurinn minnkar af því að panta erlendis frá, ekki vegna þess að sendingarkostnaðurinn er mikill, heldur vegna þess að það kostar allt að 5 sinnum virðisaukann að innheimta hann.

 

Núverandi kerfi er því að hamla samkeppni og verður að breyta sem fyrst.

Vill fella niður tolla og skatta af ódýrustu pökkum

Verður kosningabarátta xB borguð með álpeningum

Það er greinilegt að Framsókn með sinn 2% stuðning setur það á oddinn að greiða veg álversins í Helguvík með því að ráðast í Bitruvirkjun.

 

Þrátt fyrir að fulltrúar Sjálfstæðisflokksins hafi staðið að einrómasamþykkt þess að hætta við Bitruvirkjun, vegna þess að "bygging virkjunarinnar sé ekki viðunandi vegna verulegra neikvæðra og óafturkræfra áhrifa á landslag, útivist og ferðaþjónustu," að þá er núna í lagi að fórna náttúrunni.

 

Sjálfsagt afsaka þeir þetta með því að vísa í "atvinnuástandið", en ég þori að veðja að í raun sé þetta frekar til að tryggja stuðning Norðuráls við næstu kosningabaráttu Framsóknarflokksins en að þeim sé raunverulega svo annt um að tryggja Keflvíkingum Álver.

Framsókn þarf nefnilega kraftaverk til þess að þurrkast ekki út í næstu kosningum og þar sem kraftaverk eru dýr að þá var þetta líklega frumskilyrði Óskars fyrir samstarfi.

Hanna Birna borgarstjóri

"Hættið við! Hættið við!"

Þetta hrópuðu ungmennin á pöllunum í ráðhúsinu þegar síðasti meirihluti tók völdin og yfirgnæfandi hluti borgarbúa tók undir í hljóði en sýndi það seinna í könnunum um traust á þeim meirihluta.

Það sáu allir að sá meirihluti hafði hvorki styrk né traust borgarbúa til þess að stjórna borginni og sama skoðun skein úr andlitum borgarfulltrúa Sjálfstæðisflokksins á Kjarvalstöðum sem litu út fyrir að þeir væru í jarðarför.

Þeir vissu það vel að þeir voru að bjóða borgarbúum upp á óstjórn en gerðu ekkert, annað en að lýsa yfir fullu trausti á hvert öðru, þ.e.a.s. þegar þeir létu ná í sig.

 

Það sögðust allir vera sammála um flugvöllinn, Vatnsmýrina, miðbæinn, LHÍ, Bitruvirkjun og REI og meirihlutinn væri sko sterkur því þetta væri nú allt í málefnasamningnum.

 

Og núna, þegar Sjálfstæðismenn slita meirihlutasamstarfinu vegna málefnaágreinings um þessi sömu mál, að þá reyna þeir að telja borgarbúum trú um það að þeir hafi stofnað til þess meirihlutasamstarfs af fullum heilindum og búist við því að það yrði sterkt samstarf.

 

Þessir borgarfulltrúar hafa ekki einu sinni þor til þess að viðurkenna það að strax á fyrsta borgarstjórnarfundinum þar sem Ólafur var kosinn borgarstjóri, að þá vildu þeir þeir hlýða hrópum ungmennanna og hætta við.

Það var nefnilega engin ástæða til þess að fara í þetta samstarf önnur en að eyðileggja tjarnarkvartettinn. Það tókst en síðan hefur höfuðborgin nánast verið lömuð vegna deilna.

Hanna Birna og Óskar á fundi

Nýr meirihluti með 28,8% fylgi

Það er í stíl við annað hjá borgarfulltrúum Sjálfstæðisflokksins að setja saman nýjan meirihluta með minnsta mögulega fylgi borgarbúa, að fráfarandi Ólafsmeirihluta frátöldum.

Í síðustu könnun fengu þessir flokkar einungis stuðnings 28,8% borgarbúa.

 

Þó svo að það séu kosningar sem gilda að þá er vilja borgarbúa sýnt algjör fyrirlitning með þessum meirihluta.

Og talandi um kosningar að þá fengu þessir flokkar ekki einu sinni stuðning meirihluta borgarbúa í kosningunum.

 

Ég held að borgarfulltrúaflokkur Sjálfstæðisflokksins ætti bara allur að skella sér í nám í borgarstjórnarfræðum með Gísla Marteini. Hver veit, kannski er þar einhver kúrs í lýðræði sem er ekki of flókinn fyrir þetta lið.

Nýr meirihluti að fæðast

Ólympíuleikar í meirihlutamyndun

Þó það vanti ekki spennuna í handboltaleikjunum í Kína að þá er það ekkert síðra "afreksfólkið" sem keppt hefur í Ráðhúsinu á þessu kjörtímabili.

Þar er keppti í bílakjallara-flótta, lyftu-leikni, funda-maraþoni, borgastjóra-boðhlaup, borgarstjóra-sölu auk sjálfra meirihlutamyndanna, en þar er keppnin æsispennandi því Framsókn, Sjálfstæðisflokkur og Ólafur F eru með tvo meirihluta hver en allt útlit er fyrir að Framsókn og Sjálfstæðisflokkurinn taki forystu og bæti við þriðja meirihlutanum hver.

Til hliðar keppa blaðamenn í fréttasetu og keppa svo við borgarfulltrúana í klukk, en sú keppni er ekki sérlega spennandi því þegar þeir keppa við borgarfulltrúa Sjálfstæðisflokksins, eða Ólaf F, að þá eru úrslitin ávalt þau sömu: Ekki náðist i borgarfulltrúa Sjálfstæðisflokksins / Ólaf F.

Aðal munurinn á þessum leikum og Ólympíuleikunum er að þessir alþjóðlegu leikar eru á fjögra ára fresti á meðan leikarnir í Ráðhúsinu standa yfir í fjögur ár, þar sem sveitastjórnarlög gera ekki ráð fyrir því að jafn vanhæfir borgarfulltrúar nái kjöri og gera því ekki ráð fyrir möguleikanum á aukakosningum.

 

Það er því ljóst að borgarbúar muni fá að fylgjast með þessum leikum hátt í tvö ár í viðbót.

Borgarfulltrúar segja fátt

Áskorun til fjölmiðla

Í stað þess að flytja eintómar fréttir um stakar hækkanir og lækkanir af hverju leggið þið ekki smá vinnu í að skoða olíuverð á heimsmarkaði og verðið á lítranum hérna heima.

 

Með því einu að skoða heimsmarkaðsverð í íslenskum krónum nokkra mánuði aftur í tímann er hægt að bera það saman við verðið á dælunni hérna heima því þar með eru gengisbreytingar komnar inn í samanburðinn.

 

Og núna þegar olíuverð hefur lækkað aftur er lítið mál að sýna lesendum/áhorfendum myndrænt hvað lítraverðið ætti að vera ef olíufélögin væru jafn fljót að lækka og þau eru að hækka.

N1 lækkar eldsneytisverð á ný